Timor-Leste Coalition for Education (TLCE) – – 06/22/2019

Auditoria sosiál ba programa formasaun Profesores ensinu báziku iha Timor-Leste, Implementa husi Timor-Leste Coalition for Educations (TLCE), fatin ba hala’o auditoria sosiál ida ne’e mak ba iha ensinu Báziku sira iha Munisipiu 12 no RAEOA. Data implementasaun hahú husi 1 Jullu to 31 Dezembru 2019.

Metodolojia

Iha implementasaun auditoria sosiál ida ne’e liu husi Grupu diskusaun Foku, ho partisipasaun iha Grupu Diskusaun Foku no entrevista profesores 404 ho senáriu avaliasaun ba da uluk mak domina lingua, koñesimentu kona-ba area hanorin nian, tékniku pedagojika no étika professional. Ba Da Ruak Area dezenvolvimentu linguístika, sientífiku no pesoál no sosiál.

Iha indikadór ba prosesu formasaun lubuk ida maibé iha parte ne’e hakarak publika de’it kona-ba distánsia asesu ba treinamentu, profesores ho 79% mak dehan hela dook husi fatin formasaun no 21% mak hatete hela besik ba fatin formasaun. Kona-ba per diem kuaze 53% mak hatete Per Diem ne’ebé sira simu la natoon/la sufisiente, no bainhira husu kona-ba se governu la oferese Per Diem sei nafatin prontu atu tuir formasaun? 100% mak resposta sei lakohi tuir formasaun bainhira laiha Per diem.

• Iha nivel satisfasaun, kuaze besik porsentu 100% mak hatete sira formasaun ne’e ajuda dezenvolve karreira no Profesores kuaze 81% mak fó hanoin formasaun ne’e importante tebes ba sira atu hasa’e sira nia kapasidade iha area oin-oin, husi no ba nivel oin-oin liu-liu ba hakle’an siénsia (matéria ne’ebé profesores hanorin), métodu hanorin sira no dominasaun ba lingua.
• Kompriensaun kona-ba linguajen iha formasaun, husi profesores 404, 68% mak deklara sira la domina lingua mak instrutór utiliza iha formasaun.
• Dadus mós hatudu katak iha preferénsia ba lian iha manual formasaun nian, profesores prefere lingua Indonesia mak 88% kompara ho lian tetun ho valor 7.9% no 3.7 de’it mak prefere lingua Portugés.
• Impaktu husi formasaun: impaktu husi formasaun, profesores sira kuaze 76% mak dehan domina matéria ho di’ak no 24% mak dehan ladún domina, rezultadu ida ne’e kontráriu fali ho kompriensaun kona-ba lingua ne’ebé hatete 68% mak la kompriende lingua maibé rezultadu domina matéria liu fali númeru ida ne’e. Rezultadu ida ne’e Sinerjia ho hatene konteúdu ka matéria formasaun nian (76%). Matéria ne’ebé hetan husi formasaun kuaze 100% mak dehan aplika iha aula laran.
• Kona-ba formasaun iha futuru, 98% mak hatete presiza.

• INFORDEPE presiza iha planu estratéjiku própriu hodi defini objetivu sira formasaun nian, rezultadu tempu badak, tempu natoon no nia impaktu iha tempu naruk inklui indikadór sira pertinente sira atu bele sukat rezultadu ne’ebé hetan liu husi avaliasaun durante no hafoin formasaun.
• Ministériu Edukasaun Juventude no Desportu (MEJD) presiza estabelese polítika avaliasaun periódika ba profesores hodi sertifika profesores ne’ebé bele hanorin no la sertifika profesores ne’ebé labele ka seidauk bele hanorin no halo klasifikasaun ba profesores atu hanorin tuir nivel ensinu (modelu lisensa ba professor)
• INFORDEPE presiza atu estabelese sistema rekrutamentu ida ne’ebé ho intensaun atu bele halo klasifikasaun ba profesores sira nia koñesimentu molok tuir treinamentu atu nune’e bele ajuda INFORDEPE hili formasaun ida ne’ebé loos tuir nesesidade profesores nian inklui atu halo agrupamentu ba profesores hodi tuir formasaun baze nivel koñesimentu no evita atu halo formasaun jerál ba profesores hotu-hotu
• Kontinua fó formasaun ba profesores ho konsiderasaun ba aspetu distánsia profesores hela fatin, lingua ne’ebé instrutór sira uza, dezenvolve manual tuir nivel koñesimentu profesór nian no sira nia Per Diem, haree kona-ba tempu no Per Diem sira hodi asegura partisipasaun ne’ebé aas no kompriende.
• INFORDEPE presiza atu halo formasaun espesífiku ba kuríkulu ensinu báziku 1⁰ no 2⁰ síkulu ensinu báziku.