Hametin Demokrasia no Igualdade (HDI) – – 03/20/2020

HDI hala’o auditoria sosiál hodi halo avaliasaun relasiona ho implementasaun kuríkulu ensinu báziku síkulu dahuluk no daruak iha Munisipiu Ermera ne’ebé implementa husi Ministériu Edukasaun.
Objetivu: auditoria social ida ne’e hala’o ho objetivu atu halo avaliasaun ba efetividade implementasaun polítika kuríkulu Ensinu Báziku dahuluk no daruak iha Munisipiu Ermera no Avalia ezisténsia Obstákulu sira ne’ebé dezafia kualidade kuríkulu Ensinu Báziku síkulu dahuluk no daruak. Metodolojia; HDI hala’o survey no entrevista iha eskola filial públiku ne’ebé eziste klase 4 no 5 iha 28 husi eskola 101 ho estudante na’in 95 husi total 2164 no professor hamutuk na’in 63.

Tuir rezultadu monitorizasaun no avaliasaun ne’ebé maka ekipa HDI hala’o hatudu katak:
• Durasaun hanorin – maioria husi mestre sira labele hanorin tuir oráriu no durasaun 25 oras semana ida hanesan ne’ebé hakerek iha matadalan ka kuríkulu 2014. Problema ne’e akontese ho razaun katak númeru estudante kada klase barak liu no aula sira la sufisiente, no mós mestre la to’o. Prosesu aprendizajen hahú loron Segunda to’o Sábadu ba atividade extra-kurikular. Maibé maioria extra-kurikular barak liu mak kuda ai-funan no hamoos du’ut ne’ebé mak laiha ligasaun ho koñesimentu estudante.
• Efetividade implementasaun kuríkulu – dadus hatudu maioria respondente 92% relata katak husi hanorin kada matéria ho 50 minutu ne’e la sufisiente, tanba labarik barak liu no labarik balun presiza tempu barak liu hodi bele kompriende. Tanba ne’e susar ka difisil atu konvense estudante sira hodi komprende matéria ida iha minute 50 nia laran. Iha parte seluk 73% mestre sira argumenta katak implementasaun kuríkulu ne’e ladún di’ak (la efetivu).
• Formasaun ba mestre sira – Dadus hatudu katak liu husi metade 65% formasaun ba manorin tuir ida-idak nia area seidauk sufisiente, 19% nunka tuir formasaun no 16% de’it maka hatete dehan sufisiente. Ida ne’e tanba eskola barak seidauk iha mestre ne’ebé sufisiente, mestre barak kontratadu nune’e mestre sira tenke hanorin matéria liu husi rua, sira hanorin la tuir area espesialidade no hanorin taka malu de’it.
• Nivel kompriensaun – avaliasaun ne’e mós revela katak 59% husi mestre sira nia kompriensaun sobre kuríkulu ida ne’e natoon de’it, 38% dehan komprende menus no 3% maka la komprende liu kedas. Ida nee prejudika liu tan estudante sira atu aprende ka absorve tanba mestre sira la kompriende didi’ak lala’ok hanorin nian. Estudante mós revela katak metodolojia ka estratéjia husi mestre sira hodi hanorin, balun maka di’ak no alunus komprende maibé barak liu mak estudante sira la komprende tanba iha esplikasaun la relevante ho matéria ne’ebé maka sira hanorin.
• Abilidade estudante nian – dadus hatudu katak mestre sira 67% observa katak koñesimentu estudante sira husi síkulu daruak seidauk sufisiente atu hakat ba síkulu datoluk. Ida ne’e tanba estudante barak seidauk hatene lee no hakerek ho di’ak. Problema ne’e akontese tanba susar atu jere no kontrola númeru estudante ne’ebé barak, limitasaun sala de aula no mestre. Maske nunee, iha mestre sira 33% observa estudante sira husi síkulu daruak nian preparadu ona hakat ba síkulu datoluk.
• Livru hanorin hanesan dedatiku no biblioteka – maioria eskola no mestre sira 87% dehan katak laiha livru sufisiente, 55% laiha biblioteka, so iha 16% mak dehan iha maibé 29% dehan katak sira uza de’it armáriu mak hanesan fatin ba biblioteka atu estuda ka halo diskusaun. Materia dedatiku sei ajuda alunus sira HDI halo ezersísiu no pratika sira hanesan siénsia, matemátika no matéria seluk hodi aprende hodi alunus sira bele kompriende maibé la disponivel.
• Edukasaun ida ne’ebé inkluzivu – MEJD mós adopta edukasaun inkluzivu maibé seidauk iha sistema apropriadu hodi fó atendementu ba Ema ho Defisiénsia. Eskola hotu labele assesivél hanesan laiha rampa ba ema ka labarik sira ne’ebé ho defisiénsia ain ka uza de’it no mós sentina ka toilet. Mestre sira mós laiha koñesimentu ka meius hanorin jestual ka kapasidade halo tratamentu espesiál ba estudante ne’ebé ho tipu defisiénsia intelektual no matan. Iha diskusaun no entrevista ho mestre balun hato’o katak sira hahú halo tratamentu espesiál ba estudante ho defisiénsia, hanesan, labarik ho defisiénsia liman hanesan mestre sira ajuda hodi kaer estudante nia liman atu hakerek no ba defisiénsia tilun mestre sira haruka tuur iha oin atu nune’e sira bele rona ho di’ak no bele observa besik liu husi manorin na’in sira no bainhira ko’alia.
• Moris ida ne’ebé saudavel – dadus hatudu katak 40% eskola mak seidauk asesu bee moos ne’e sei kategoria aas tebes no ladún di’ak. no mós, hare ba lixu fatin, liu husi metade 51% eskola maka seidauk soe fo’er iha fatin no menus husi 50% maka iha ona lixu fatin ne’ebé própriu.

Bazeia ba deskobrementu sira rekomenda ba governu, li-liu Ministériu Edukasaun atu:
• Aumenta edifísiu ka sala de aula ba eskola sira ne’ebé seidauk sufisiente. MEJD presiza halo identifikasaun ba eskola sira ne’ebé alunus barak no Salaun la sufisiente, no mós análize kreximentu labarik sira ne’ebé moris iha kada suku atu nune’e bele halo protesaun ba estudante hira maka tama ba eskola kada tinan nune’e bele harii aula eskola tuir númeru estudante.
• Aumenta mestre permanente ba eskola sira ne’ebé presiza. MEJD presiza halo rekrutamentu ba profesores permanente sira nune’e bele responde ba nesesidade ida estudante 25-30 iha sala ida. No ho mestre permanente sira bele motiva sira hodi halo servisu tuir sira knar di’ak liu tanba sira sente iha seguransa servisu ba sira nia future.
• Konstrui biblioteka, aumenta livru tuir ba periodu no mós troka livru sira ne’ebé naklees, tuan no dodok ona inklui matéria didáktikus.
• Hadi’a sistema hygiene hanesan sentina no sistema abastesimentu bee moos iha eskola hotu no mós kria fatin lixu ne’ebé própriu.
• Implementa polítika edukasaun ne’ebé iguál no inkluzivu hodi estabelese eskola ne’ebé assesivél ba Ema ho Defisiénsia hanesan rampa, toilet, mestre/a sira tuir kursu lian jestual no disponibiliza livru no matéria sira iha braille.
• Sistema rekrutamentu no formasaun ba mestre sira tenke tuir area espesialidade kursu ka hanorin nian atu nune’e labele tau todan hotu ba mestre ida atu hanorin matéria hotu.
• MEJD presiza servisu hamutuk ho Konsellu dos País atu bele halo akompañamentu direitu iha eskola sira atu hare no observa métodu no estratéjia ne’ebé mestre sira uza hodi hanorin atu halo avaliasaun kedas tuir ba padraun kuríkulu nian.
• Haforsa kapasitasaun ba mestre sira presiza kapasitasaun iha literasia Portugés no konsidera mestre ko’alia lian Portugés iha rekrutamentu.
• Presiza kontrola mestre sira iha area rural, sira ne’ebé hetan ona distribuisaun rejime especial mais la halo tuir sira nia knar.
• Presiza harii rezidénsia ba mestre iha eskola hotu atu nune’e bele fasilita mestre sira ne’ebé mai husi fatin seluk atu hela hodi hanorin ho efetivu tanba distribuisaun rejime espesiál ba mestre sira iha area rural ladún la’o ho di’ak.