Community Based Rehabilitation Network Timor-Leste (CBRN-TL) – – 03/17/2020

Auditoria sosiál ne’ebé hala’o husi CBRN-TL kona-ba programa atendementu subsídiu ba ema ho defisiénsia ne’ebé implementa husi Institutu Nasionál Seguransa Sosiál iha Munisipiu Ermera, Postu Administrativu Railaco, Hatulia, Ermera, Letefoho no Atsabe.

Objetivu, atu buka hatene impaktu husi programa ba ema ho defisiénsia no nia impaktu ba mudansasa dezenvolvimentu social ekonomia; atu hare asesibilidade ba ema ho defisiénsia ba servisu atendementu subsídiu apoiu ba ema ho defisiénsia husi MSSI; atu hatene nivel satisfasaun husi benefisiáriu ema ho defisiénsia husi servisu atendementu subsídiu apoiu ba ema ho defisiénsia; no atu buka hatene kona-ba susesu no dezafiu sira nune’e kontribui ba hadi’ak implementasaun iha futuru.

Metodolojia ba auditoria sosiál ida ne’e diskusaun grupu foku entrevista, observasaun no revee literature sira. Entrevista ba sample hamutuk 258 ne’ebé kompostu husi EhD na’in 156, Autoridade Lokál 61 no FGD 40 ho tarjetu ema ho defisiénsia, kestionáriu ba autoridade lokál no diskusaun grupu entre ema ho defisiénsia no membru família.

• Valor husi programa – maioria 42% respondente revela katak programa nee di’ak uitoan tanba labele kobre sira nesesidade hotu, 35% hateten di’ak Los, 23% hateten di’ak. Iha diskusaun grupu foku sira dehan katak programa nee di’ak ba sira nia moris hanesan bele hetan hahán, Loke negósiu ki’ik, redús no diskriminasaun.
• Benefísiu – EhD no autoridade sira 66.4% relata katak programa ne’e lori mudansa iha sira nia moris hanesan; sira mós iha ona lian iha sira nia uma laran no komunidade hodi konsidera no respeita Ema ho defisiénsia.
• EhD ne’ebé seidauk simu subsídiu – liu husi metade 50.5% EhD mak seidauk hetan benefisia husi programa ne’e tanba sira seidauk hetan kartaun identifikasaun nune’e mós sira seidauk partisipa iha foti desizaun iha família

• Utilizasaun osan subsídiu – auditoria sosiál identifika katak 6% husi respondente ema ho defisiénsia ne’ebé hetan osan husi programa apoiu subsídiu maioria utiliza ba sosa hahán hodi hasa’e nutrisaun iha família, no 18.8% utiliza ba sosa roupa, iha mós lista seluk ne’ebé investe ba nesesidade hanesan tratamentu saúde, suporta family, transporte, Edukasaun no negósiu. Ne’e interesante tebes husi Ema ho Defisiénsia durante FDG hateten Maske osan ki’ik ho montante $30 kada fulan maibé bele simu tinan ida dala rua $180 kada fulan neen maibé bele investe ba negósiu hanesan fa’an modo, loke kios hodi sustenta sira nia moris. Durante halo FDG iha Railaco katak “Ha’u fa’an malus, sigarru, xinelus no mina” hateten husi Ema ho Defisiénsia ida.
• Asesibilidade – respondente ho 27.4% dehan katak distánsia dook sai obstákulu ne’ebé limitadu ba asesu prosesu dokumentu sira hanesan atestadu médiku.
• Grupu idade entre 25-34 ho 26% maka asesu ba iha programa apoiu subsídiu kompara ho EhD idade entre 55-65 ba leten 10% de’it. Ida ne’e akontese tanba hetan informasaun husi família, Autoridade Lokál, Organizasaun Defisiénsia, Kolega, TV no seluk tan maibé ba sira ho idade avansadu bele tama ona kategoria idade terseira idade nia benefisiáriu.
• Grupu Idade entre 18-24 ho 13% maka asesu ba programa refere, tanba sira seidauk hatene informasaun, difikuldade iha prosesu rejistu hodi hetan dokumentu. Ida ne’e hato’o mós husi respondente balun iha diskusaun grupu foku.
• Nivel asesibilidade informasaun ba programa – dadus hatudu katak 86.5% respondente husi EhD barak mak hetan informasaun kona ba programa apoiu subsídiu husi MSSI no Autoridade Lokál.
• EhD 44% mak dehan katak programa apoiu subsídiu bele ajuda asesu servisu rehabilitasaun hanesan fizioterapia no 26.6% ba halo Terapia Lian no ko’alia.
• Nivel satisfasaun – kuaze metade 48% husi respondente maka relata katak sira satisfás tebes ho programa apoiu subsídiu ba ema ho defisiénsia tanba iha mudansa hanesan bele ba merkadu, halo ligasaun ho komunidade, bele foti desizaun iha família, bele asesu ka suporta edukasaun iha sira nia moris.
• Auditoria Sosiál mós identifika katak Ema ho Defisiénsia barak maske mate ona maibé sei kontinua selu nafatin tanba laiha sertidaun mate nian.

Bazeia ba deskobrementu sira rekomenda ba MSSI no instituisaun relevante sira atu:

• MSSI-INSS halo kooperasaun ho Banku BNCTL liu husi banku movel hodi halo pagamentu ba ema ho defisiénsia hanesan mós pagamentu ba programa idozu.
• Institutu Nasionál Seguransa Sosiál (INSS) bele halo ligasaun ho Ministériu da Administrasaun Estatal no Ministériu Saúde hodi halo Aranjamentu espesiál ba rejista Ema ho defisiénsia Mental liu husi atendementu dokumentasaun hanesan Kartaun identidade no atestadu médiku.
• Revizaun dekretu lei governu No. 19/2008 subsídiu de apoiu ba idozu e inválidu hodi bele konsidera Ema ho defisiénsia no konsidera idade husi 17 mai kraik.
• Institutu Nasionál Seguransa Sosiál (INSS) halo kolaborasaun ho Organizasaun defisiénsia hanesan CBRN-TL, ADTL, AHDMTL, RHTO no seluk hodi halo sosializasaun programa apoiu subsídiu entre komunidade sira kona ba prosesu rejistu hanesan kritéria dokumentasaun, prosesu hetan dokumentasaun, prosesu aplika no prosesu simu osan.
• Re update lista benefisiáriu hodi hamosu ema ne’ebé mate, ema ne’ebé mak asesu ba programa terseira idade no rejistu ema foun.