Luta Hamutuk (LH) – Manutensaun ba pontes no estradas rural (R4D) – 10/05/2018

Manufahi   October 5, 2018

SEITOR
Infrastrutura

MINISTERIU NE’EBE INVOLVE
Infrastrutura, Ministeriu Obras Publiku

PROGRAMA PERIOD
May 1, 2018 – October 5, 2018

Rezumu kona ba Programa no metodolojia Auditoria Sosial

Introdusaun

Profile Luta Hamutuk

Luta Hamutuk nudar ogranizasaun naun governmental ida iha Timor Leste desde 2005, organizasaun ne’e hari’i husi Aktivista Timor oan nain hitu (7). Vizaun organizasaun ne’e mak estabelesementu Ukun Rasik A’an (self determination) iha Republica Democratica de Timor-Leste) hanesan manifesta komitmentu nasional ba justica ekonomia nomos partisipasaun publiku, no respeita ho valoriza Demokrasia, Igualidade no Transparensia. Durante tinan 13 nia laran Organizasaun foku hodi halo aktividade monitoramentu no advokasia ba projeitu infrastruktura baziku (Edukasaun, Saude, Be’e mos, Elektrisidade no Estrada Rural).

Husi servisu hirak ne’e iha tinan 2018, Luta Hamutuk mos hetan fi’ar husi Konsorsiu (FONGTIL no TAF), atu hala’o programa auditoria sosial liu atividade monitoramentu ba projetu infrastrutura iha Munisipiu Manufahi, durante Fulan 5 nia laran (Fulan Maiu to’o Fulan Setembru).

Auditoria sosial nudar inisiativa inovadu husi Eis Primeiru Ministru S.E. Dr.Rui Maria de Araujo iha VI Governu Konstituisional hodi hamosu no kria espasu ba komunidade no sosiedade sivil hodi hola parte iha programa dezenvolvimentu, liu-liu iha monitorizasaun no avaliasaun ba implementasaun programa Governu nian. Inisiativa  ida ne’e fortalesidu liu husi asina “Memorando de Intendimento ka MoU” entre FONGTIL no Primeiru Ministru iha 25 Maiu 2015. Ita apresia mos komitmentu Governu kontinua fo espasu ba organizasaun sosiedade sivil hodi hala’o auditoria sosial. Hein katak inisiativa ida ne’e sei kontinua nafatin iha Governu VIII  ne’ebe sei forma iha tinan ne’e. Depois de asina MoU ho Xefe Governu União Europeia iha komprimisu hodi fo apoia inisiativa boa Governasaun iha Timor-Leste.

Bazeia ba inisiativa ne’e iha tinan 2018, Uniaun Eurepa fo apoiu 100% ba sosiedade sivil inklui Luta Hamutuk  atu hala’o auditoria sosial ba politika Governu hanesan tuir mai:

Politika Governu

Dezenvolve, Hari’i, Rehabilita, Mantein, no Jere Estrada, Pontes no Kontrolu ba Inundasaun.

Padraun ka indikador estabelese husi MOPTK: MOPTK kontrolu ho forma efisiensia, efikasia, no fasil asesu bazeia ba balansau ho lolos entre orsamentu ne’ebe iha no rezultadu ne’ebe ita hakarak.

Meta final: kolokasaun efisiensia no efikasia husi “ema ne’ebe klaru ho fatin los no tempu ne’ebe los” iha organizasaun ne’ebe ho jestaun mak di’ak ne’ebe bele halo mudansa ho efikasia.

Sub- Programa/Atividades Indikador Dezempena Lina baze Meta Final
Manutensaun ba pontes no estradas rural (R4D) KM estradas rural o kondisaun (pontes hanesan parte integradu husi estradas) Iha 2016, 542 KM ho kondisaun no manutensaun 402 KM ho kondisaun no manutensaun

Atu sukat politika no programa husi MOPTK iha leten, Luta Hamutuk hala’o auditoria sosial uza metodolojia  Developement Check Tools nudar feedback husi kraik ba leten (bottom up) hodi komunika direta prosesu no progressu dezenvolvimentu mak Governu despeza ba komunidade, nune’e bele haree klean kona-ba informasaun basiku, partisipasaun, efektividade servisu iha prosesu inisiu to’o iha ramata.

Deskobrimentu Xave

Ministeriu Obras Publikas Transportes no Komunikasaun

Diresaun Jeral Obras Publikas

Diresaun Nasional Estradas Ponte no Kontolu Cheias

 

ROADS FOR DEVELOPMENT PROGRAM-R4D

Kontrator            : Implomar Timor Unip.Lda Numeru Kontratu: MPWTC-CD-17002
Naran Estrada    : Same-Rotuto Distansia            : 0+000-10+400km
Tipu Servisu       : Manutensaun Periodiku Valor Kontratu    : $24,171.28
Data Hahu          : 01 Agostu 2017 Data Remata      : 30 July 2018
Suku Sira Ne’ebe Besik Estrada   : Letefoho,Rotuto
Tekniku Supervizaun ba Obra       : DNEPC,MOPTC
Servisu Importante                      : Manutensaun Rutina,Cement Masonry,Bio-Engineering

Durante iha monitoramentu Luta Hamutuk atu kolekta deskobrementu sei fahe ba Faze tolu (3):
Faze asesu Informasaun:
1.  Projetu ne’e antes implementa enkontru ho komunidade iha Aldeia Kotalala-Suku Letefoho

2. Luta Hamutuk no komunidade konsege asesu informasaun liu husi kuadru projetu.

3. Luta Hamutuk hetan dokumentus (Bill of Quantity, kwtansi pagamentus, lista trabaladores no karta akordu)

Faze involvimentu komunidade:
1. Projetu antes implementa trabalador sei hetan treinamentu loron 2 husi ILO, Kompania no Obras Publika atu hasa’e kosenementu trabalador konaba oinsa servisu iha projetu.
2. Projetu antes implementa mos enkontru ho komunidade iha Aldeia Kotalala Suku Letefoho.
3. Komunidade involve iha projetu ema hamutuk 36 kompostu husi Mane: 14 no Feto: 22
4. Servisu iha Projetu fahe Grupu no kada Grupu ema nain 5.
5. Item servisu ne’ebe mak trabalador atu halo mak hanesan: lere du’ut iha Estrada ninin, hamos valeta no taka Estrada kuak.
6. Tipu servisu iha projetu ne’e borong no fahe ba tempu bai-loron (servisu loron 12), no tempu udan (servisu loron 24)
7. Servisu kada kilo metro 1 selu $ 5.00 maibe ne’e selu tuir progressu servisu fiziku.

Efektividade Projetu:
1. Komunidade kontenti ho projetu ne’e tanba komunidade asesu ona ba transporte publiku hodi bele fasilita ba merkadu no asuntu social seluk tanba iha tinan hirak kotuk komunidade uza kuda sai hanesan transporte hodi lori sasan.
2. Projetu ne’e rasik nia progressu atinji ona 63% (progressu servisu to’o Fulan Jullu).
3. Projetu ne’e rasik implementa la tuir kontratu no konsege ekstende tiha ona to’o iha Fulan Dezembru 2018.
4. Kompania seidauk selu direitu trabalador to’o agora husi (Fulan Janeiru to’o Jullu 2018).
5. Ladun iha koperasaun dia’k entre tekniku sira iha Munisipiu Manufahi.
6. Autoridade Lokal no Lider Komunitariu balun ladun hatene informasaun konaba projetu manutensaun periodiku.
7. Governu selu Kompania Lokal la tuir timeline ne’ebe mak iha nune’e bele estraga fali relasaun social iha nivel baze (problema komunidade ho kompania).

Rekomendasaun

Bazeia ba deskobrementu ne’ebe mak mensiona iha leten Luta Hamutuk hato’o nia rekomendasaun hanesan tuir mai:

Rekomendasaun iha tempu badak:

  • Husu ba konsorsiu fo apoiu balun nune’e ami bele kontinua follow up kazu sira ne’ebe mak ami relata ona iha ne’e hodi hetan nia solusaun.
  • Kazu trabaladores sira ne’ebe mak kompania seluk selu to’o agora, ida ne’e hanesan mos responsabilidade moral ida ba Luta Hamutuk hodi kontinua nia advokasia nune’e bele hetan solusaun, maibe tamba limitasaun finanseiru husi organizasaun entaun ami sei labele kontinua kazu ida ne’e. tamba ne’e ami rekomenda ba konsorsiu (FONGTIL ho TAF) karik posivel bele ajuda hodi halo akompanamentu ba prosesu ne’e.
  • Husu ba konsorsiu hodi konsidera kazu hirak mak ami mensiona iha leten hodi relata ba parte kompetente atu nune’e bele hetan nia solusaun iha tempu badak.

Rekomendasaun ba iha futuru:

1.Efektividade avaliasaun no fiskalizasaun ba kompania lokal sira ne’ebe implementasaun projetu  iha Munisipiu sira, nune’e bele sukat kapasidade, jestaun no finanseiru.

2. Rekomenda ba governo liu husi Ministeriu Obras Publika bainhira atu fo projetu ba iha kompania Lokal tenki hare’e ba kompania ninia kapasidade nune’e bele hala’o jestaun ba projetu no implementa tuir kontratu.
3. Rekomenda ba Governu liu husi instituisaun indepedenti sira (PDHJ) tenki sosializasaun asuntu direitu umanu ba Kompania Lokal sira, liu-liu dereitu ema vulneravel no ema ho defisiensia nune’e bainhira involve ema hirak ne’e iha ona protesaun ba sira.
4. Rekomenda ba ADN Munisipiu, Tekniku Obras Publiku Munisipiu, Tekniku Kompania no Tekniku Ajensia sira tenki iha servisu ho kolaborativu hodi hala’o fiskalizasaun ba pojetu sira nune’e bele asegura transparansia, akuntabilidade no kualidade iha implementasaun projetu.
5. Rekomenda ba Governu atu aumenta tan tekniku ADN no Obras Publika iha nivel Munisipiu nune’e bele hala’o fiskalizasaun ba projetu ho efektivu liu tanba durante rekursu tekniku la to’o maibe kada tinan Governu aloka projetu barak ba iha nivel Munisipiu.
6. Rekomenda ba Governu liu husi Obras Publiku Munisipiu no ADN Munisipiu antes implementa projetu di’ak liu enkontru ho Autoridade Lokal no Lider Komunitariu iha nivel Munisipiu hodi fahe informasaun konaba projetu ne’ebe mak atu implementa iha nivel Munisipiu nune’e ema hotu bele hatene bele hala’o kontrolu iha implementasaun.

Involvimentu Auditoria Sosial

Imi iha asesu ba kontratu?
Sin

Formatu Involvimentu Komunidade
Individual, Aldea, Suku, Postu Administrativu, Munisipiu

Komprimisiu Guvernu hosi
Ministeriu

Partisipasaun Jeneru
Mane, Feto

Benefisiariu ba Projeitu: 36