Institutu Matadalan Integradu (IMI) – Auditoria Sosial ba Servisu Agrikultura iha Munisipu Ermera – 08/29/2018

Ermera   August 29, 2018

SEITOR
Agrikultura

MINISTERIU NE’EBE INVOLVE
Ministeriu Agrikultura

PROGRAMA PERIOD
April 24, 2018 – September 30, 2018

Rezumu kona ba Programa no metodolojia Auditoria Sosial

Partisipasaun sidadaun nian ba kontrolu sosial ba programa Governu nian importante teb-tebes iha prosesu konstrusaun de estadu. Timor-Leste nudar Nasaun joven ida ne’ebé nia dezenvolvimentu sei frazil teb-tebes iha seitór oin-oin. Questaun hirak ne’e presiza teb-tebes sidadaun nia involvimentu iha prosesu dezenvolvimentu atu garante kualidade servisu husi servidór do estadu nian ba nia povu sira.

Maioria husi óbra estadu nian barak liu gastu povu nia osan liu husi fundu mina-rai ne’ebe tinan-tinan aloka liu husi Orsamentu Jerál do Estadu (OJE), tan ne’e povu iha direitu no obrigasaun atu kontrola servisu hotu ne’ebe fornese atu nune’e bele garante transparansia no akuntabilidade iha prosesu implementasaun.
ONG Institutu Matadalan Integradu-IMI hanesan organizasaun sosiedade sivil ida ne’ebe eziste iha munisipiu Ermera, hanoin katak auditória sosial nudar meius diak liu ba sidadaun sira atu halo kontrolu ba nia servisu hotu mak servidór do estadu sira oferese hodi garante kualidade no rezultadu servisu ida ne’ebe diak no fo benefisiu ba ema barak.

Ita nia Konstituisaun RDTL fo’o biban sosiedade sivil hodi halo auditoria sosial hanesan: ”Sidadaun hotu-hotu iha direitu ba liberdade ba espresaun no direitu atu informa no hetan informasaun ho izensaun (Artigu 40.1). Sidadaun hotu-hotu iha direitu atu aprezenta petisaun, keixa no reklamasaun ba órgaun soberanu ka autoridade naran ida atu defende nia direitu ka interese jerál (Artigu 48). Sistema demokrátiku nia kondisaun no meiu importante ida maka mane ho feto sira-nia partisipasaun direta no ativa iha vida polítika (Artigu 63.1).

Objetivu Jerál
Objetivu jeral husi pograma auditoria sosial ne’e mak atu avalia servisus sira ne’ebé servisu munisipal agrikultura nian hala’o iha komunidade, hodi nune’e bele formula rekomendasoens ruma ba hadiak kualidade de servisu seitór agrikultura iha munisipiu Ermera.

Objetivu Espesífiku
Objetivu spesifiku sira husi programa auditoria ne’e mak hanesan tuir mai ne’e:
1. Atu monitoriza no avalia dezempeño no resultadu de servisu husi estensionista sira destakadu iha nivel suco
2. Atu monitoriza no avalia program fila rai gratuita, jestaun ba tratores no impaktu husi programa ne’e rasik.

1.3. Metodu Auditoria Sosial

1) Sample Suco no Respondente
Auditoria social ba programa agrikultura ne’e kobre iha postu administrativu 5 iha munisipiu Ermera, kada postu hili suku 2 sai sampel ho total suco 10. Kada suco respondente mai husi agrikultor nain 6, lider komunitaria 5 no extensionista suku 1. Total respondente kada suco iha nain 12, total respondente ba kada postu administrativu nain 24 no total respondente husi postu lima hamutuk nain 129.

2) Instrumentu (tools) nebe uza hodi halo Auditoria sosial
Instrumentu ne’ebe IMI uja hodi halo auditoria sosial ne’e maka instrumentu fokus diskusaun grupu (FDG) hodi uza ba promove diskusaun ho agrikultor sira no lideransa komunitaria sira no interpersonal interview ho extensionista suco nian.

3) Prosesu Kolesaun Dadus
Ekipa IMI halo koordenasaun ho Servisu Agrikultura munisipal Ermera nian, koordenador extensionista agrikultura munisipal, lider komunitaria no agrikultor sira hodi informa konaba objetivu programa auditoria ne’e, atu nune’e grupu alvu sira bele iha informasaun nato’on no bele koopera hodiak durante implementasaun aktividade iha terenu. Hafoin ne’e ekipa kolektor dadus IMI nian vizita suku tarjetu atu bele kolekta dadus bazeia ba kuesionariu ne’ebe IMI dezeña ona.

4) Metodu analiza dadus ka informasaun:
IMI uza grafika hodi halo analiza ba data kuantitativu sira. Informasaun narativu ka dadus kualitativu sira, IMI uza metodu “situational analysis” no “problem comparative analysis” hodi analiza no formula deskobrimentu sira mak hetan iha auditoria sosial ne’e.
1.4. Grupu Alvu
Grupu sira ne’ebe sai hanesan grupu alvu ba programa auditoria sosial ne’e kompostu husi lider komunitariu sira, pessoal extensionista sira no agrikultor sira.

Deskobrimentu Xave

Iha auditoria sosiál ida ne’e, IMI halo ba Servisu Agrikultura Munisipál Ermera liu-liu hare’e variavel bo’ot rua hanesan destakamentu extensionista iha suco no utilizasaun & jestaun ba tratór iha suco sanulu (10) hanesan suco Laubonu no Malabe (postu administrativu Atsabe), suco Goulolo no Eraulo (postu administrativu Letefoho), suco Leimea Kraik no Asulau Saré (postu administrativu Hatolia), suco Riheu no Talimoro (postu administrativu Ermera), suco Fatuquero no Lihu (postu administrativu Railaco). Total respondente sira ne’ebé ekipa intervistador sira halo intervista durante programa auditoria sosial ida ne’e hamutuk 129 respondentes ne’ebe kompostu husi lider komunitaria, agrikultor sira no extensionista destakadu iha suco tarjetu.
Iha analiza ida ne’e, IMI halo ho metodu rua. Dahuluk IMI halo analiza jerál dadus husi suco sira hotu hodi hare’e persentajen husi respondente sira ba pergunta ne’ebé iha questionariu. Daruak IMI halo analiza espesifiku ba dadus husi kada suco hodi hare’e no sukat prestasaun servisu iha kada suco.

1. Vizita grupu agrikultór sira
Respondentes hamutuk 129, respondentes hamutuk 31 (24.03%) deit mak resposta katak extensionista sempre halo vizita bebeik ba sira hodi fasilita formasaun no mos apoio tekniku seluk, maibe respondentes 98 (75.97%) mak hatete katak extensionista sira vizita dala ruma deit ba sira.

2. Estabelesimentu Grupu Agrikultura iha Suco
Respondentes hamutuk 26 (20.16%) mak fo expresa katak kada tinan extensionista halo agrupamentu ba grupu agrikultores ida ou rua deit iha suku,no respondentes hamutuk 91 (70.54%) mos hatete katak kada tinan extensionista sempre halo agrupamentu ba grupu hamutuk tolu to ha’at iha suku ne’ebe destaka ba,no respondentes hamutuk 12 (9.30%) mak hatete katak extensionista la halo agrupamentu ba grupu agrikultores iha suku.

3. Formasaun Tekniku Agrikultura ba Agrikultor sira
Respondentes hamutuk 45 (34.88%) husi total respondentes 129 mak resposta katak extensionista sira sempre fasilita formasaun kona-ba tekniku kuda, produsaun adubus no konservasaun fini. Aleinde ne’e, respondentes hamutuk 84 (65.12%) mak resposta katak extensionista sira fasilita formasaun dala ida ka rua deit ba agrikultór sira iha suco ne’ebe sira destaka ba.

4. Akompañamentu ba Grupu Agrikultór sira
Respondentes hamutuk 60 (46.51%) mak hatete katak extensionista sira la halo akompanamentu ba produsaun agrikultores nian hodi asesu ba merkadu, respondentes 44 (34.11%) mak hatete katak extensionista sira sempre halo akompanamentu kada fulan ba agrikultores, no 25 (19.38%) mak hatete katak extensionista sira sempre halo akompanamentu kada loron ka semana ba sira nia produsaun ne’ebe mak sira produs ona hodi asesu ba merkadu.

5. To’os Ezemplár ou To’os Demonstrasaun
Respondentes hamutuk 54 (41.86%) mak resposta katak extensionista sira halo to’os ezemplar barak iha suku,respondentes 60 (46.51%) mos resposta katak extensionista sira halo to’os ezemplar ida deit iha suku,no respondentes 15 (11.63%) mak resposta katak extensionista sira koalia deit no la halo to’os ezemplar iha suku.

6. Trator Fila Rai Agrikultór nian
a. Trator Bo’ot (Kubota)
Respondentes hamutuk 129 (100%) resposta katak tratores bo’ot ne’ebe mak Guvernu liu husi Ministeriu Agrikultura no Peskas (MAP) distribui ona ba suku sira iha teritoriu nasional tomak,inklui Munisipiu Ermera,iha suku sanulu (10) ne’ebe mak IMI halo asesmentu ba ne’e fila rai gratuita inklui kombustivel no tratorista ne’e kabe ba responsabilidade Guvernu nian.
b. Trator Liman
Respondentes hamutuk 129 (100%) mak resposta katak hand tractor ne’ebe grupu sira iha ne’e wainhira fila rai agrikultores nian,sira sempre selu no ense mina.Ho razaun tanba hand tractor ne’e responsabiliza husi grupu sira ne’ebe mak Ministeriu intrega ona ba,no ne’e laos ona responsabilidade Governu nian,seluk mos mak husi osan ne’ebe agrikultor sira selu ne’e hodi halo manutensaun,no selu tratorista sira ne’ebe mak halo serbisu.

7. Jestaun ba Tratór
– Jestaun ba Trator Bo’ot (Kubota)
Respondentes hamutuk 129 (100%) mak resposta katak MAP halo jestaun diak ba trator bo’ot sira ne’ebe mak iha hodi kontinua fila rai komunidade nian.Respondentes sira resposta nune’e tanba trator ne’ebe MAP distribui ona ba agrikultor sira iha suku durante ne’e sira so uza deit no manutensaun,mina no jestaun tomak ne’e responsabilidade Guvernu nian.
– Jestaun ba Trator Liman (Hand Tractor)
Total respondentes hamutuk 129 (100%) ne’ebe sai hanesan sampel iha asesmentu ne’ebe IMI halo ne’e resposta katak regulamentu ba utilizasaun tratores ki’ik ladun forti hodi regulariza grupu sira ne’ebe mak simu ona trator ki’ik.

8. Orariu Fila Rai Agrikultor nian
Respondentes hamutuk 116 (89.92%) mak resposta katak orariu ba fila rai komunidade nian tuir tempu antes udan monu rai,no respondentes 13 (10.08%) mak resposta katak orariu fila rai la tuir tempu tanba komunidade kuda tiha ona mak foin extensionista no tratorista sira halo planu hodi fila rai.

9. Efetividade ba Utilizasaun Trator
Respondentes hamutuk 129 (100%) mak resposta katak trator ne’ebe mak distribui ba agrikultor sira uza duni ho maximu ba fila rai, maibe dala barak mos trator ne’e rasik seidauk naton atu fasilita sira hodi fila rai tanba ne’e mak suku balun dalawain orariu fila rai la tuir nia tempu tanba tenki hein trator halo operasaun fila rai iha postu ou suku seluk remata mak foin bele kontinua halo operasaun ba suku seluk.

Rekomendasaun

Rekomendasaun sira husi Komunidade, Lider Komunitaria, Extensionista no Institutu Matadalan Integradu-IMI
Bazeia ba preokupasaun hirak iha leten, mak ikus mai grupu alvu sira no IMI hakarak hato rekomendasões sira mak hanesan tuir mai ne’e:

1) Agrikultor no Lider Komunitariu sira
1. MAP presiza kria regulamentu ida ne’ebe forti hodi regulariza no kontrola serbisu pessoal extensionista sira nian.
2. Husu ba MAP atu aumenta tan kuantidade mina ba tratores bo’ot no tratores ki’ik,tanba komunidade sira barak mak laiha kbi’it atu sosa mina hodi fila sira nia rai.
3. Husu ba Governu atu kontinua halo rekrutamentu ba extensionista inklui tratorista sira. Rekrutamentu extensionista tenki rekruta duni ema husi suku refere, hodi destaka ba suku sira ne’ebe mak to agora seidauk iha extensionista tanba maioria extensionista ne’ebe agora iha ne’e ema ida responsabiliza ba suku rua ou liu.
4. Trator sira ne’ebe agora iha ne’e kondisaun hahu a’at ona tanba ne’e husu ba Governu atu kontinua apoiu trator ki’ik no trator bo’ot ba agrikultor sira, atu nune’e fasilita agrikultores hodi fila rai no bele utiliza mos rai sira ne’ebe mak sei abandona hela hodi hasae kuantidade produsaun.
5. Husu ba Governu atu distribui ba area foho lolon sira tanba trator bo’ot ne’ebe Governu distribui ona ne’e so bele halo operasaun iha rai tetuk deit.
6. Husu ba MAP halo manutensaun regular ba trator bo’ot ne’ebe avaria ona hodi bele halo fali servisu fila rai ho efetivu no lalais.
7. Trator ne’ebe agora iha ne’e prefere atu labele para iha edifisiu MAP Munisipiu maibe para iha postu ka suku deit nune’e bele hafasil agrikultores wainhira presiza fila rai.
8. Husu ba extensionista sira atu halo kontrolo no fasilita formasaun ba grupu sira kada fulan nune’e bele motiva agrikultores sira hodi kontinua halo serbisu no hasae sira nia kuñesementu hodi adapta ho teknolojia
9. Husu ba extensionista atu asina lista prezensa iha suku nune’e fasil ba autoridade lokal sira hodi kontrola serbisu extensionista sira nian.
10. Governu presiza investe iha seitor infraestrutura hodi hadia dalan nune’e bele fasilita agrikultores hodi lori sira nia produtu husi suku sira asesu ba merkadu (jeral).
11. Guvernu presiza hadia no konstrui irigasaun foun hodi fornese be’e ba natar no to’os agrikultores sira nian.
12. Husu ba MAP atu kontinua fo apoio material agrikultores hanesan:besi,karau dikur,enxada ba agrikultores sira ne’ebe iha foho lolon
13. Husu ba MAP atu oferese fini hanesan: batar,hare,ikan,fore keli no seluk tan ne’ebe mak agrikultores sira presiza.
14. Husu ba MAP atu oferese mos makina dulas kafe ba area sira ne’ebe mak iha potensia ba produtu kafe (jeral).
15. Husu ba MAP atu kontinua apoio plastik tunnel ba grupu agrikultor sira iha tempu udan nune’e bele salva sira nia produtu husi udan be’en.
2) Extensionista
1. Husu ba Governu atu kontinua fasilita transporte no kombustivel ba pessoal extensionista sira ne’ebe mak to agora seidauk simu transporte husi Governu.
2. Husu ba Governu atu konstrui edifisiu no alojamentu ba pessoal extensionista sira iha suku sira ne’ebe mak to agora seidauk iha,atu nune’e bele fasilita extensionista nia serbisu iha suku.
3. Husu ba MAP atu aloka verbas orsamentu balun espesifiku ba formasaun nian hodi tulun extensionista sira fornese formasaun ho diak ba agrikultór sira.
4. Husu ba MAP atu rekruta tan pesoal extensionista hodi kompleta suco hirak ne’ebe seidauk iha extensionista propriu, atu nune’e kada extensionista ida fokus ba suco ida deit.
5. Husu ba Governu atu aumenta kustu operasional ba extensionista sira nune’e bele fasilita extensionista halo serbisu ho diak.
6. Husu ba Guvernu atu hasae tan salariu ba extensionista sira nune’e bele motiva diak liu tan extensionista sira serbisu ho efisiente no efikasia.
7. Husu ba MAP Munisipiu atu hadia politika distribuisaun mina ba suku sira iha tempu ne’ebe komunidade sira presiza fila sira nia rai
8. Husu ba MAP atu fornese aimoruk ba animal nian wainhira animal moras (jeral).
9. Husu ba autoridade lokal sira atu kontinua fortifika lei tara bandu ne’ebe mak implementa ona iha Munisipiu Ermera nune’e regula no fo sansaun ba komunidade sira atu labele husik animal arbiru hodi estraga agrikultor seluk nia produsaun.
ONG Institutu Matadalan Integradu-IMI
Iha parte ne’e, ONG Institutu Matadalan Integradu-IMI hafoin halo tiha observasaun direita ba suco sira no rona direita preokupasaun sira husi komunidade, ikus mai lori ONG IMI mai ho sujestaun hirak hanesan tuir ne’e:
1. Servisu Hamutuk ho Parseru sira
Servisu parseria importante iha servisu komunitaria ohin loron. Ita nia sosiedade ohin eziste autores oin-oin ne’ebé halo servisu iha seitór agrikultura ho dimensaun oin-oin hanesan fornesimentu rezultadu peskiza, fornesimentu input agrikultura, apoiu formasaun, apoiu material no equipamentu sira, fasilitasaun kreditu, ligasaun merkadoria no seluk tan. Autores hirak ne’e hanesan seitor privadu, organizasaun internasional no lokál sira, instituisaun akadémika sira, instituisaun bankaria sira, grupu agrikultura sira, asosiasaun agrikultura sira, kooperativa agrikola sira no instituisaun seluk ne’ebé halo servisu iha seitór agrikultura. Hanesan extensionista ne’ebé diak, presiza kria no hametin parseria ida forte ho autores hirak ne’e hodi bele tulun servisu extensaun nian lao diak iha kampu. Aproveita didiak rekursu hirak ne’e hodi halao dezenvolvimentu agrikultura ida integradu no holistiku.
Iha auditoria sosiál ne’e, IMI deskobre katak durante ne’e servisu extensaun agrikula ka extesionista sira ladun uza didiak rekursu hirak mak iha liu husi halo parseria dezenvolvimentu agrikultura ne’ebe eziste iha munisipiu no suco sira. Parseria ne’ebé dau-daun ne’e eziste mak extensionista sira halo ho ajensia internasional no lokal sira no grupu agrikultura ne’ebé eziste iha suco. Seluk husi ne’e seidauk esplora didiak, tan ne’e ita la hare’e dezenvolvimentu agrikultura intregradu iha suco. Fornesimentu input agrikultura menus teb-tebes, asesu ba formasaun sira menus, asesu ba kreditu menus, asesu ba merkadoria mos menus teb-tebes.
2. Diversifikasaun produtu ba bazeia ba potensia suco
Ne’e importante ba extensionista sira atu halo servisu bazeia ba potensia ne’ebe kada suco iha. Purezemplu, suco A iha potensia ba natar no ortikultura, extensionista fokus halo akompañamentu ba potensia bo’ot ruma ne’e, fasilita formasaun barak, halo akompañamentu regular ba agrikultor sira hodi bele hetan duni rezultadu servisu ne’ebe sira halo.
3. Rekrutamentu Extensionista Bazeia ba Méritu
Rekrutamentu hotu ne’ebé Ministeriu Agrikultura hala’o ba extensionista sira presiza ho baze ba meritu. Ne’e signifika rekrutamentu ida bazeia ba kapasidade intelektual, kompetensia profesional no integridade pesoal. Wainhira pesoal extensionista ida iha kapasidade tolu iha leten sei tulun nia atu hala’o servisu ida qualidade no garante rezultadu diak husi servisu ne’ebe nia halo.
4. Formasaun Kontinua ba Extensionista sira
Formasaun inportante atu hasa’e kuñesimentu no abilidade pesoal extensionista ida nian. Wainhira extensionista ida iha formasaun barak ne’e sei ajuda nia atu ajusta a’an ho mudansa iha mundu no ajustu a’an ho realidade iha kampu.
5. Inkorporasaun ba Teknolojia Sosial no Teknolojia Apropriadu
Importante iha servisu extensaun agrikola nian, presiza konsidera teknolojia sosial ka teknolojia ezistente ne’ebe komunidade pratika ona iha tempu kleur no iha benefisiu ekolojiku no ekonomiku diak. Normalmente introdusaun teknolozia foun la 100% adopta husi komunidade tamba dalaruma la kondiz ho situasaun sosiokultural no sosioekolojika ne’ebe mak iha. Tan ne’e neseariu atu inkorpora teknolozia ezistente no teknolozia introduzida extensionista sira introduz hodi bele garante partisipasaun komunidade nian iha prosesu konstrusaun teknolozia ida ho baze ba kuñesimentu lokal no kuñesimentu global. Ne’e diak tebes hodi estimula sentidu de pertensia ba teknolozia ne’ebé ita implementa hamutuk ho komunidade.
6. Hametin Kapasidade Komunikasaun
Komunikasaun nudar meius ida diak hodi halo asaun. Wainhira extensionista hala’o komunikasaun ida diak ho agrikultór sira, ne’e sei ajuda tebes agrikultor sira hodi halo servisu hirak ne’ebe kontribui ba mudansa. Tan ne’e abilidade ba komunikasaun diak mos presiza hametin iha kada pesoal extensionista sira hodi bele realiza komunikasaun ida efetivu no asertivu.
7. Hametin Regulamentu Uzu Trator ida ne’ebe Rigorozu
Hametin regulamentu ba uzu trator ho rigorozu importante atu garante utilizasaun no jestaun trator hod diak hodi bele hala’o servisu ba agrikultor sira ho efetivu. Liu tan ne’e kontrolu ba utilizasaun trator husi tratorista sira mos importanti atu garante katak trator sira duni ba halo servisu ba komunidade.
8. Fasilita Ligasaun Merkadu entre Produtór no Komprador
Agrikultor barak iha problema ho merkadu. Dala barak agrikultór sira produz mas merkadu laiha atu fa’an ne’e implika motivasaun agrikultor nian hodi produz ho kuantidade bo’ot liu tan. Servisu extensionista nian iha kontestu ne’e mak atu fasilita ligasaun merkadu entre produtor/ agrikultor ho komprador ka merkadu, hodi nune’e produsaun ne’ebe agrikultor sira produz bele iha asesibilidade ba merkadu no garante rendimentu ida diak ba agrikultor sira.
9. Hadia no Promove Politika Povu Kuda Governu Sosa
Politika ne’e iha nia konseitu diak teb-tebes.Iha nia implementasaun mak dala ruma la seriu hodi fo duni benefisiu ba agrikultor sira. Normalmente iha ita nia sosiedade eziste dikotomia entre komunidade no governu ba asuntu ne’e. Komunidade dala barak questiona katak produtu barak mas Governu la sosa. Iha tempu hanesan Governu mos questiona katak komunidade nia produsaun uitoan no la garante kuantidade, kualidade no kontinuidade. Ne’e hanesan argumentu parsial ne’ebe ita sempre rona. Problema iha kontestu ne’e parte rua la seriu atu halo kooperasaun mutua ida, atu bele motiva malu no garante katak prosesu kompra e venda ne’e lao duni. Parseru mutua importante atu promove, ne’e signifika Governu aleide sosa produtu, sira mos iha dever atu insentiva agrikultor sira atu produz liu husi formasaun no subsidiu ka kreditu hirak ne’ebe bele fasilita agrikultor sira produz ho kuantidadeda barak liu tan. Agrikultor sira iha responsabilidade atu utiliza didiak rekursu sira mak Governu oferese hodi halo mudansa ba servisu ne’ebe sira halo. Ne’e deit mak durante ne’e, IMI observa katak seidauk lao diak no ikus mai kontribui ba politika ne’e falla.

Involvimentu Auditoria Sosial

Imi iha asesu ba kontratu?
N/A

Formatu Involvimentu Komunidade
Individual, Aldea, Suku, Postu Administrativu, Munisipiu

Komprimisiu Guvernu hosi
Ministeriu

Partisipasaun Jeneru
Mane, Feto

Benefisiariu ba Projeitu: 129