Forum Tau Matan (FTM) – Literacy Program – 10/30/2018

Aileu   October 30, 2018

SEITOR
Edukasaun

MINISTERIU NE’EBE INVOLVE
Ministeriu of Edukasaun

PROGRAMA PERIOD
May 1, 2018 – October 31, 2018

Rezumu kona ba Programa no metodolojia Auditoria Sosial

Sumáriu husi resultadu peskiza ba programa Alfabetizasaun nia implementasaun iha Munisipiu Aileu espésifiku ba Postu Administrativu Aileu Villa no Postu Administrativu Lequidoe nian identifika katak mosu prátika admistrasaun ladiak no aktu korupsaun balu, inklui menus kooperasaun ho autoridade lokal no ladún iha transparesnia ne’ebe akontese durante implementasaun programa Alfabetizasaun nian. Tamba ne’e resultadu hosi programa ne’e rasik labale maximu no direitu hosi monitoring (Tutór) sira balun mós hetan violasaun no FTM identifika katak akontese aktu barak mak viola prinsipiu governasaun diak, direitu sosial no ekonomia.
Hafoin hala’ao tiha análise ba resultadu peskiza nian no halo konsultasaun ba dokumentu relevante sira hatudu katak programa Alfabetizasaun nia atinjimentu kuntidade menus tebes no defisil atu bele atinji visaun Diresaun Nasional Ensinu Rekorente (DNER) katak iha 2015 Timor oan hotu livre ona hosi alfabetizasaun no kompletamente introdus ona programa nasional ekivalensia iha teritóriu laran tomak, tamba;
Até 2018 chefe suku sira ne’ebe partisipa iha intervista ne’e deklara katak sei nafatin iha komunidade barak iha sira nia suku mak la hatene le’e, hakerek no sura
Programa Alfabetizasaun hanaran “Sim Eu Posso” no etapa daruak Sim Eu Posso Seguir” até 2018 seidauk kompleta
Programa nasional ekivalensia no 2018 ne’e foin mak introdus ba estudante/benifisiariu iha komunidade suku balun nian deit, liu-liu ba estudante/benifisiariu sira ne’ebe konesege passa iha prosesu avaliasaun
Estudante/benifisiariu barak mós mak deklara katak sira simu sertifikadu maibe afinal sira seidauk bele le’e, hakerek no sura ho diak, balun seluk konfesa katak, tamba programa la kontinua ona buat ne’ebe uluk sira aprende mós agora sira haluha hotu ona.

Deskobrimentu Xave

Durante prosesu koleksaun dadus, FTM konsege deskobre informasaun sira ne’ebe konsidera la la’o tuir prosedura normal implementasaun programa Alfabetizasaun nian iha Suku 10, Postu Adminstrativu Aileu Villa no Lequidoe Munisipiu Aileu nian hanesan:
1. Rekrutamentu ba monitoring (tutor) sira iha nivel Suku la liu hosi prosesu rekrutamentu ne’ebe regeroju ne’ebe bele evita aktu Kolusaun no garante katak programa Alfabetizasaun hetan duni monitoring (tutor) ida ne’ebe kualifikadu no iha abilidade nesesariu atu hanorin
2. La iha kooperasaun diak entre ekipa programa Alfabetizasaun ho autoridade lokal sira nune’e defisil atu garante tranparensia durante implementasaun programa Alfabetizasaun
3. La iha monitoriamentu no avaliasaun regular ba implementasaun programa Alfabetizasaun hosi Ministériu Edukasaun Nasional, Ministériu Edukasaun Munisipiu ka hosi autoridade lokal sira nune’e defisil atu identifika obstaklu no desafiu regularmente no foti solusaun imediatamente hodi garante susesu implementasaun programa nian no atinjimentu nia resultadu sira
4. Subsidiu ba monitoring (tutor) sira dala ruma tarde, situasaun ida ne’e la enkoraja atu monitoring (tutor) ka hala’o sira nia servisu ho diak liu
5. Subsidiu ba monitoring (Tutór) sira balun la la’o tuir pagamentu normal ka prosedimentu finansa nian nune’e mosu aktu Korupsaun balun iha prosesu pagamentu ba subsidiu monitoring (Tutór) sira nian la hanesan.
6. Pagamentu lolós ba kada monitoring (Tutór) mak $80.00/fulan ba fulan tolu $240.00 maibe realidade nebe’e mak sira simu $200.00/fulan tolu
7. Monitoring (Tutór) iha suku balun la simu gerador no osan atu sosa mina ba gerador
8. Monitoring (Tutór) sira konfesa katak lolós sira tenke hetan subsidiu osan ba transporte lokal ho montante $.5.00/loron no subsidiu mina ba gerador $10.00/kada loron maibe ida ne’e la akontese
9. Autoridade Munisipiu no Lokal sira la iha konesementu adekuadu kona lala’ok programa Alfabetizasaun nian tamba la iha relatoriu ruma ne’ebe mak publika.
10. Partisipasaun autoridade lokal nian to’o deit iha prosesu rekrutamentu tutor no estudante benifisiariu sira, la iha ona koordenasaun hafoin rekrutamentu remata nune’e hosi ema ne’ebe autoridade lokal sira rekomenda atu sai monitoring (tutor) sira la hatene sé mak manan atu sai nudar monitoring (tutor) iha sira nia suku no sé mak lakon. Autoridade sira mos la hatene ona kona ba total sira nia populasaun nain hira mak regista, nain hira mak tuir aula, nain hira mak konsege konklui no hetan sertifikadu no nain hira mak seidauk ka la konsege konklui.
11. Fatin hanorin dala barak muda hosi fatin ida ba fatin seluk konforme disponibilidade uma nain nian tamba ne’e prosesu aprendijazem labele la’o ho diak tamba ambiente la seguru no amigavel.

Rekomendasaun

Hosi resultadu analisa ekipa peskiza no monitoriamentu Auditoria Sosial FTM nian hakarak atu rekomenda ba Ministériu Edukasaun asaun sira nesesaria ba hadiak liu tan prosesu implementasaun programa Alfabetizasaun iha Munisipiu Aileu mak hanesan:

1. Presiza atu hadiak uluk gestaun no adminstrasun liu hosi estabelese ekipa servisu programa Alfabetizasaun (DNER) Munisipiu Aileu nian ne’ebe sei konsiste hosi Koordenador Programa Alfabetizasaun Munisipiu nain 1, Gestor finansa programa nian nain 1 no official monitoriamentu no avaliasaun nain 1. Ekipa tomak tenke halo kooperasaun besik liu ho autoridade munisipiu nian hodi bele garante transparensia, akuntabilidade no inklusivu.
2. Prosesu rekrutamentu ba Monitoring (tutor) sira tenke regiroju no basea ba méritu labele indika deit.
3. Asegura katak prosesu pagamentu subsidiu ka kategoria seluk bens no servisu nian tenke la’o standar minimal prosesu finansa nian, presiza iha mós kontratu klaru ne’ebe mensiona osan ka bens no servisu sira seluk ne’ebe tama ba kompetensia monitoring (tutor) nian.
4. Estabelese rede servisu interministerial atu kria regulamentu ne’ebe emfase kriteriu sira hanesan wainhira idosu sira atu simu sira nia subsidiu tenke assina no bandu atu hanehan liman deit. Kondisaun ida ne’e kria hodi bele motiva komunidade sira ne’ebe analfabetu atu esforsu a’an hodi aprende no iha parte seluk Ministeriu Edukasaun pelomenus iha evidensia minimu wainhira hanoin atu deklara resultadu ruma hosi susesu programa Alfabetizasaun nian.
5. Ministeriu Edukasaun persija estabelese ambiente ka fatin proprio no fasilidade ba programa analfebitizasaun iha nivel postu ka municipal.

Involvimentu Auditoria Sosial

Imi iha asesu ba kontratu?
Sin

Formatu Involvimentu Komunidade
Suku, Postu Administrativu

Komprimisiu Guvernu hosi
Postu Administrativu, Munisipiu

Partisipasaun Jeneru
Mane, Feto

Benefisiariu ba Projeitu: 50